رسالة للحاجة

إسعاد يونس
 رسالة للحاجة
■ الأهل والأحباب فى دولة الإمارات.. لا تؤاخذونا يا جماعة.. فيه ولد سهانا وتسلل واحنا بره البيت وقعد يلعب فى الأجهزة ويطلع بيانات خايبة زى وشه.. بس نرجع الدار واحنا حانوريله مقامه..
■ الأهل والأحباب فى سوريا.. الناس المطحونة بين العذابين.. لا تؤاخذونا يا جماعة.. الشعب المصرى لا يقطع جزءا من جسده..
■ الأهل والأحباب فى أى حتة فى الدنيا.. لا تؤاخذونا.. معلش.. إحنا آسفين احتياطى.. الله يعلم علاقتنا حاتتدرمغ مع مين تانى.. أصل فيه ناس عمالة تلوّش عندنا وتستهبل عن التصويب فى الاتجاه الصحيح..
■ البعدا فى إسرائيل.. إحنا مش آسفين ولا نيلة.. جتكوا داهية تاخدكوا إنتوا وحلفاءكوا اللى معرشين عندنا دول..
■ بالمرة بقى وبجملة إحنا آسفين.. أنا آسفة يا مبارك.. أثناء التمنتاشر يوم بتوع الثورة اتأخرت انت فى التنحى.. ويومها أسميتك بالنطع.. واستكترت قوى إنك تركت الشعب طول التمنتاشر يوم يطالبك بالتنحى وأنت لا تستجيب.. لكنك فى آخرهم اتنحيت أو تخليت أو مشيت وخلاص.. فأنا آسفة إنى سميتك نطع.. طلع فيه أنطع منك..
■ فيه ناس منزعجة جدا من مشاهد تقبيل الأيادى وتلبيس الجزم.. والبوس والأحضان ومباريات طحن الشفاتير الأوفر دى التى نراها من الإخوان.. طب وإيه يعنى؟؟.. ما هو كورليونى كان بيتباس إيديه برضه.. وعصابات المافيا كانت تمارس القتل والسلب والنهب بنظام السمع والطاعة.. والأب الروحى عندهم هو هواه المرشد بتاع دول.. سلو تنظيمات إرهابية وعصابات دولية يعنى.. فعاتى يعنى يا جماحة..
■ هؤلاء الذين يثبطون من عزيمتنا ويشيرون إلى أن الناس لن تصمد فى الشوارع إذا ما دخل عليهم رمضان.. أحب أقولهم إن جيشنا الباسل وجنودنا العظام عبروا فى العاشر من رمضان.. والساعة اتنين الضهر يعنى فى عز عز الصيام.. وكان بقالهم ست سنين مرميين فى الخنادق رمضان يشيلهم ورمضان يحطهم.. ولما عبروا كانوا بيهتفوا مسلم ومسيحى الله أكبر.. ما فعلا الله أكبر فى كل الأديان.. لا تكونوا عايزين تصادروا الكلمة دى كمان لحسابكم.. ويومها حطمنا خط بارليف.. وهدينا الحائط.. عقبال ما ندك خط مُقرييف ومُتخلييف وإرهابييف يا رب.
■ لا يحمل الإخوان فوق أكتافهم وعلى كفوفهم فقط دم الشهداء.. لكنهم يحملون أيضا دم كل هؤلاء الذين ماتوا حزنا على بلدهم.. صديقتى سمية الرقيقة.. كانت ابنة لأم عاشقة لبلدها.. ظلت تراقبها منذ بدأت الدولة فى ظل حكم الإخوان تنهار والأنوار تظلم داخل النفق.. لم يكن على شفتى الأم غير عبارة «يا خسارة يا مصر» رغم أنها كانت فرحانة جدا فى بداية الثورة.. مع بداية حكم المحروس بدأت الأم تدخل فى صمت طويل.. وظلت سمية تلاحظ كيف تشاهد الأم الأحداث وهى مصابة بخرس عاطفى تجاه وطنها وذكرياتها.. كل حدث وضيع كان يترك خطا على وجهها ويطفئ جزءا من نور عينيها.. حتى أسلمت الروح فى صمت.. بلا أى مرض عضوى.. غير حزنها على بلدها.. وليست الوحيدة..
■ من المشاهد التى أضحكتنى حتى أوغمن على.. مشهد محمد مرسى وهو يدخل الاستاد المغطى فى يوم الزار الإغريقى بتاع قطع العلاقات مع سوريا ده.. واستعراض إحنا جدعان قوى وكتار أهو.. بتاع سبعتاشر ألف يعنى.. ويلف فيه شوية وهو بيحيى الناس بتوعه وفرحان قوى بيهم ويكاد يسأل البويسة بتوعه صرفتولهم الوجبة والا لسه؟؟.. كان يمر على لافتات مكتوب عليها ارحل يا بشار.. هنا لم أستطع السيطرة على الكركعة.. بقى يا راجل شعب بلد بحالها فيما عدا شوية مهاويس بيطالبك بالرحيل.. قوم إنت تتمشى تحت اليفط دى بمنتهى الثبات كده؟؟.. ولا كإن الكلام ليك أصلا؟؟.. يا ترى كنت بتقول لنفسك إيه ساعتها؟؟..
■ فكرونا يا جماعة نبقى نعمل كشف هيئة للرئيس الجديد والنبى.. يعنى هو مين وابن مين.. عنده ملف تخابرى فى أى جهة أمنية والا نضيف.. حسن السير والسلوك والا أعوجهم.. خريج جامعات والا سجون.. يحمل الجنسية المصرية هو وعيلته والا كوكتيل انتماءات.. ذكى والا غبى.. شايف نعمة والا شبعة بعد جوعة.. بيتكلم لغات والا دونت ميكس.. متعلم آداب حديث وبروتوكول وإيتيكيت والا ضهر الجاموسة كان مدارى بلاوى.. بيعرف ياكل بالشوكة والسكينة والا بيلغمط بصوابعه ويعمل اللقمة ودن قطة.. ولما ياكل بيعمل هرم فى المعلقة والا بياكل نونو نونو.. وبيقفل بُقه والا بيفندقه وهو بيمضغ.. وبيعرف يشرب شوربة والا بيقيم الطبق على حنكه ويدلق؟؟.. بيستحمى والا مكتفى بالوضوء ويطلسق.. فى المقابلات الرسمية بيخلى إيديه جنبه والا بيسيبهم يتجولوا فى أنحاء جسمه كإنهم لسه بيتعرفوا عليه من جديد.. ولما يروح بلاد الخواجات بيقابلوه كما يجب والا بيبعتوله سواق ميكروباظ شايل يافطة عليها اسمه.. عنده شخصية والا بيتشخط فيه.. حاجات كده يعنى.. الاحتراز واجب برضك..
■ عاصيم عاصيم.. نعم يا ريسو.. العيال دول مضايقيننى وعمالين يقولوا حايشقلطونى آخر الشهر.. فين دول؟؟.. أهم هناك أهم.. اللى لابسين فلنات مكتوب عليها تَشقلُط دول.. أُمات كساكى على روسهم.. وماسكين كروت حمرا فى إيديهم.. عمالين يشوحوا ويقولوا حايشقلطونى.. طب بتعيط ليه ما يشقلطوك يا عم.. إنت إيه أولك من آخرك؟؟.. حاتتشقلط من هنا إخوانك حايزقلطوا غيرك.. مانتوا كلكوا بسم الله ما شاء الله صبة واحدة وفورمة واحدة جتكوا نيلة نفس الغبا والتلامة زى ماتكونوا واخدين الدكتوراهات بتاعتكوا دى من مصنع جبنة واحد.. ماتروحلهم يا خويا بتندهلى أنا ليه؟؟.. مانا رحتلهم يا عاصيم.. لقيتهم لايصين زيى وضاربين لخمة.. قلتلهم إنتوا مش مصدريننى وقاعدين تشغلونى زى عرايس الليلة الكبيرة؟؟.. ما تعملوا حاجة.. لقيتهم ملهيين فى تهريب فلوسهم بره وبيظبّطوا حايهربوا على فين وبرضه حايسيبونى.. خايفين على روحهم.. عارفين إن الناس فاقسة إن مش أنا المقصود بعينى.. أنا عبد المأمور.. يقولولى بوس نجاد من بقه أبوس.. قاطع سوريا أأقاطع.. وأنا ولا فاهم حاجة.. أُقف جنبى إنت بقى.. أقف جنبك إيه يا عم؟؟.. هو أنا طايقك أشاسا.. إنت رخو كده ومارق.. طريقتك مابتعجبنيش لا إنت ولا إخوانك دول.. أنا بعز الدمممم.. أموت فى الدبح والتعليق.. بسمع صوت الرصاص فى ودانى كإنه مزيكة القرب.. أنا نفسى أموّت الشعب ده كله وأقعد ألعب فى البلد لوحدى.. عايز أعوض يا ريسو.. ماشبعتش من شوية الفكة اللى موتتهم زمان.. وولاد الكلب قطعوا عليا الشهوة وحبسونى.. إجرى روح لصاحبك التخين اللى بتصدره دايما فى الخناقات.. لأ يا عاصيم بقى.. ماهو كل مرة يبعت العيال بتوعه ويخلع.. فالعيال حرنت.. اتصدر إنت بقى يا عاصيم.. أنا خايف..
■ خلاص خلاص ماتعيطش.. يا ساتر.. بس على شرط.. أعمل اللى أنا عاوزه.. محدش يطلع يكذبنى أو يعلن أى إعلانات من بتاعة ده مش تبعنا والكلام ده.. سيبنى أهرتل بقى.. حارعبهملك.. افتحلى إنت الطريق وسيبنى أحس بالزعامة اللى نفسى فيها.. ولو الأنفار شحروا معايا ابعتلى شوية عيال م اللى فاضلين معاكوا.. عشان يملوا المكان كده ويهللوا.. إياك بقى تسيب عليا ظباط م اللى ضميرهم صاحى دول يقبضوا عليا ويقرفونى.. حاعملك مهرجان ذعر.. والحساب يجمع..
■ الحساب يجمع إزاى يعنى؟؟.. طبعا يجمع.. حاشتغل ببلاش أنا والا إيه؟؟.. طب عايز كام.. لأ الموضوع مش فلوس.. أمال إيه.. أول ما أخلصك م الزنقة دى.. تستأذن.. أستأذن إزاى.. ترحل ياعم.. تنزاح من وشى بقى.. وإن ما انزاحتش يا عاصيم؟؟.. حاشقلطك أنا.. عادتنا والا حانشتريها؟؟..
■ دير مز باطرسون.. بليظ تيك يور بؤجه آند ليف أور كانترى.. يو أولويز ليسن تو زا رونج بيبول.. زيى آر أول لايرز آند زيى ويل جو تو زا فايرز.. وى زا ريل بيبول أوف زيس كانترى هيت يو.. بيكوز يو آر زا ديفلز آدفوكيت.. بط بليظ.. بيفور يو رايد زا ناقه وتشرخى.. تيك زروت هجاظى آند أول زا بلودى جانج ويز يو.. زيى ويل تيرن يور كانترى تو أنازر أفجانستان.. زن يو ويل تيست فروم زا سيم هانى.. بالشفا يا حاجة..