شباب 6 ابريل | اللجنة الاعلامية
إنت كأخواني أو منتمي للتيار الإسلامي، ماعنديش مشكلة إنك تقول عني "علماني" أو "كاره للشريعة" أو أى حاجة، ما دام دي قناعتك اللي مريحاك في الحياة، إنت حر.. وإنت كفلول أو منتمي لنظام مبارك/السيسي، ماعنديش مشكلة إنك تقول عني "عميل"، أو "متمول"، ما دام دي قناعتك اللي مريحاك في الحياة
لكن حقي عليك، أياً كان إنتمائك، إنه يبقى في عدالة في البلد، عشان لما إتحاكم بتهمة الإضرار بمصر أقدر أدافع عن نفسي، ولما اتبرأ أو اتحبس يبقى بناءً على حُكم موضوعي مش بأوامر السُلطة.. حقي عليك، أياً كان انتمائك، إنه يبقى لي مساحة في المجال العام، عشان أشرح أفكاري ومواقفي اللي إنت بتفسرها بمزاجك إنه ضد الدين! حقي عليك، أياً كان انتمائك، إنك ماتطلبش مني أبقى نسخة كربون منك.. إنت عايز #مرسي يرجع، إنت حر، بس ده مش رئيسي.. إنت عايز #السيسي يُحكم إنت حر، بس ده مش رئيسي!
وحقك عليا.. إن كُنت مع الثورة أو ضدها.. إن كنت مؤيد لي أو معارض.. حاببني أو كارهني.. إنك أفضل أدافع عنك، ضد "القتل" و"التعذيب" و"إنتهاك كرامتك".. حقك عليا، إن موقفك السياسي مايكونش مبرر لسحقك كإنسان.. حقك عليا، إني أفكّر نفسي كل ما أنسى، إنه مهما كانت دماغك، أو تصرفاتك، فـ دي بلدك زى ما هى بلدي، ولازم نعيش فيها سوا.. حقك عليا إني أحاربك وإنت في السُلطة وظالم، حتى لو كنت أيدتك.. وإني أنصرك وإنت معارض ومظلوم، حتى لو كنت عارضتك! حقك عليا، إني ماسمحش لفكرة جامدة أو رمز أنا بقدره يخلوني عبد في قطيع بيتحرك دايماً ضدك.. إني أحاول طول الوقت أفهمك وأبني بيني وبينك جسر، وإني أطور قناعاتي وأعدلها عشان تبقى الحياة لينا كلنا في بلدنا محتملة! وإنت قاهر أنا هاسميك بإسمك سواء مبارك أو إخوان أو سيساوي، بس لو مقهور، فإنت بالنسبة لي "إنسان" وبس! ونصرتك جزء من مبادئي!
لما مصر يكون فيها جيش محترف بعيد عن السياسة.. وأجهزة أمنية مستقلة مهمتها الدفاع عن حياة الإنسان وكرامته.. حط مليار خط تحت "كرامته" دي.. كل الناس هاترتاح، مؤيد مرسي واللي بيعارضه، مؤيد السيسي واللي بيعارضه.. لأنه هايبقى عارف إن في فرق بين الدولة وبين السلطة.. إنتماء الدولة للإنسان وده مفروض مايتغيرش.. وإنتماء السُلطة للحزب أو الفصيل اللي حاز ثقة الناس ليوصلها..كل الناس هاتبقى مرتاحة ومش خايفة، لانها عارفة إن لما الدنيا تدور وتتبدل المقاعد.. العدالة والحرية والكرامة هايبقوا متصانين في كل الأحوال.. غير كده، الغابة اللي عايشين فيها، والحقد والكراهية والخبل الجماعي والهستيريا اللي مظاهرهم في كل شىء حوالينا.. هايخلوا البلد من سىء لاسوأ!
دافع عن "الإنسان" وكرامته.. تدافع عن مصر وتنصرها
موضوع: شباب 6 ابريل | اللجنة الاعلامية 
الثلاثاء 3 يونيو 2014 - 18:51
