يا ثورة مصرهتتعادي

أنا هصبر لحد الصبح ما يشقشق
أنا قاعد ومش ماشي
أكيد القاضي هيدقق
ويشوف حاجه مشافهاشي
وبكره العدل يتحقق
بمين صادق ومين مغشوش
وشبح الظلم يتعلق
ونفقع عينه بالخرطوش
أكيد القاضي هيحقق
وتفرحوا يا اللي مفرحتوش :

براااااااءة !!!!!!
أكيد القاضي مش هو
وميزان العدل مش جوا
ليه بيداري ع الجاني
ويقتل صوتي بالقوة
أكيد مسمعش عن جيلي
أكيد الثورة ,,, موصلتلوش
أكيد الحق هيجيلي
وأكدب شغل حلق حوش
أنا مش ماشي هستني
أنا هثبت هنا مكاني
ومهما يفوت عليا وشوش
أنا فاكر مين الجاني
أكيد طبعا ومنسيتهوش
تاخد بشهادتي يا قاضي ؟؟!!!
ما دام الصورة مش كافية
والحكم براءة بالعافية
ما دام الدم شئ عادي
وراحت روحي ع الفاضي
ما دام حكمك كده وراضي
أنا قاعد لحد الفجر
هصحي كل اللي مات بالغدر
بصوت واحد وهننادي
ما دام حق اللي راح مرجعش
يا ثورة مصرهتتعادي

كلمات: حسام طه