يوميات نايم في الأرياف " مهاجر"

يوميات نايم في الأرياف

إصحى ،تان تان تان، فوق، تان تان تان , اصحى فوق ......

طيب يا عم سعد يا صغير خلاص صحيت ، دا انت مزعج اوففففف

كل مره اقول انا هاغير نغمة المنبه دي في الموبايل بس بارجع في كلامي تاني

اصل بصراحة دي النغمة الوحيدة اللي بتصحينى من النوم.

مع إني بصحى مطروب وقلبي بيتنطط في جيب البيجامة اللي فوق.

وبعدين يوم التلات هو اليوم الوحيد الي بصحى فيه بدري.

اما باقي ايام الاسبوع باصحى على معاد الغدا لما ابويا يرجع من صلاة العصر.

لكن يوم التلات حالة خاصة باصحى مع أول ضوء للنهار.

طبعاً اكيد عايز تسأل ليه باصحى يوم التلات بدري واشمعنى يعني يوم التلات

ما تستعجلش انا جايلك في الكلام .

انا اسمي علاء حاصل على كلية علوم قسم جيلوجيا من خمس سنين بالتمام والكمال .

بعد نجاحي في الثانوية بمجموع معقول كنت ممكن ادخل بيه كليه محترمة اهلي اتحايلوا عليَّا ادخل كلية تربية علشان اتعين بعد التخرج بس انا رفضت وبشده

تدريس ايه ووجع دماغ إيه انا عايز ادخل كلية علوم وقسم جيلوجيا بالتحديد !!

وسبب اصراري وتمسكي بهذا القسم هو انبهاري بعالمنا الكبير فاروق الباز بعد ما قريت حوار له في مجلة الشباب وعرفت انه اتخرج من القسم ده.

من يومها قررت ادخل نفس القسم وامشى نفس مشواره

وان شاء الله اكون خليفة له في وكالة الفضاء الامريكية ناسا .

ما هو لازم حد يكمل مشواره ويحمل الراية من بعده.

علشان كده رفضت ادخل كلية التربية زي ما قالولي .

ودخلت كلية علوم واتخرجت بتقدير جيد جداً ومن بعد التخرج وانا نايم في البيت مستني حد من وكالة الفضاء يتصل بيا !خمس سنين مستنى ولسه ما حدش اتصل !

بيتنا في قرية من قرى الدلتا " من الأرياف يعني "

وفـ موقع استراتيجي في مدخل البلد في شارع السوق.

السوق في الشارع ده طول الاسبوع ، بس السوق الكبير يوم التلات ، يوم التلات ده البلاد اللي حوالينا بتيجي للسوق عندنا علشان تبيع انتاجها من خضار و طيور و لبن وسمنة وجبنة وقشطة و تشتري حاجاتها من فاكهة وخضار وخلافة(معظم الباعة من خارج بلدنا) وعدد قليل منهم من بلدنا ! اصل بلدنا مش مشهورة بحاجة بلدنا مستهلكة بس ،فيه بلاد حوالينا مشهورة بزراعة الخضار وبلاد مشهورة بزراعة الرز وبلاد بزراعة شتلات الفاكهة إلا بلدنا متلاقيهاش مشهورة بحاجة غير نهم الشراء والاستهلاك اصل شباب بلدنا هجر الفلاحة والأرض واتجه للتعليم و السفر!

والاراضي إما متأجره لفلاحين من البلاد اللي حوالينا يزرعوها او زرعناها احنا ببيوت الخرسانة!

المهم نيجي بقى ليوم التلات ده اليوم المفتوح عندي ، ده يوم مختلف لازم اصحى بدري علشان الحق السوق من أوله ، باصحى مع بداية وصول البياعين للسوق واحضر المعارك على حجز المكان ووصول عربيات الكرنب والخس والخضار والفاكهة.

بعد ما اتوضى واصلى الصبح ابعت اجيب الطعمية السخنة والعيش واعمل كباية الشاي الظريفة والجرنال بتاع امبارح واقعد في البلكونة اتفرج على السوق والستات وبنات الدبلوم و بنات الكليات وهما رايحين المدارس والكليات والموظفين إلى طالعين على الشغل الصبح كل ده بيعدي من تحت البلكونة وانا قاعد ماسك الجرنال عين على الجرنال وعين على الشارع لغاية الظهر لما بنات الدبلوم يرجعوا واطمن عليهم (اصل بنات الكليات بيرجعوا متأخر) وبعدين اديها نوم لغاية العصر.

خمس سنين على الحال ده لدرجة إني حفظت السوق وزباينة ، حفظت حتى الستات بتشترى إيه وفصالهم مع الباعة في السوق وحفظت حتى الرجالة والشباب اللي بيعدوا من السوق ومين بيعدي بحسن نيه ومين بيعدي بسوء نية و سوء خلق كمان.

فيه اللي بيعدي السوق يجري وفيه اللي مش مستعجل بيعدي على مهلة اصل العجلة من الشيطان، وبرضه التأني من الشيطان !

خمس سنين على الحال ده طول الليل سهر مع الشلة إما بنلعب طاولة او شطرنج او 31 على سجاير وحتى في 31 انا دايماً إما نايم 14 جر او نايم تحت 31 ما فيش مره ظبطت واحد وثلاثين

سهراتنا دايماً إما عندي (علشان انا قاعد لوحدي في الدور الثاني ) أو عند الواد ياسر.

ونقضى النهار كله نووووووووووم إلا يوم التلات طبعاً!

النهارة التلات صحيت على رنة التليفون قبل المنبه ما يضرب

- الوووو

- ايوه يا خفيف (عارف انك ياسر هااااااااا)

- لأ لسه ما بدأتش الوردية ، انا بابدأ ورديتي الساعة 6.30

- ابوك تعبان ! وبعدين ، على اساس إني دكتور !

- نروح فين

- المستشفى

- وانا دوري إيه

- هو ابوك ناوي يخلع ولا إيه

- هو فيه اصلاً حد يتعب يوم التلات وكمان بدري كده.

- طيب ممكن ابوك يريح شوية ونروح بعد الظهر.

- دا انت خنيق انت وابوك

- خلاص هالبس واجيلك

- مش هاتأخر

- سلام

لبست بسرعة وخدت ساندوتش على السريع مع كباية شاي "علشان السجاير" وخدت نظره على السريع من البلكونة ، الله يخرب بيتك يا ياسر بوظت اليوم اللي باستناه من الاسبوع للأسبوع .

على ما خلصت الفطار ونزلت كان السوق بقى زحمة وبدأت اشق طريقي بين غابة من النساء وشنط الخضار و البط والوز والفراخ...... و و و

ياسر ساكن في وسط البلد

ولازم اقطع السوق كله علشان اوصل لبيته.

بس تعرف الموضوع مختلف تماماً عن المشاهده من فوق!

كده بتشاهد المباراة من ارض الملعب وبتشارك كمان.

ولأني كل تلات باخد مقعدي في المقصورة من الصبح لغاية الظهر، ودي اول مره امشي في السوق وانزل البلد في الوقت ده كنت مفكر نفسي انا المشجع الوحيد لهذا الملتقى النسائي الإسبوعي لكن بصيت على البالكونات على طول السوق لقيت المشاهدين كثيييييير اكثر من مشجعي ستار اكاديمي وكلهم ما شاء الله مؤهلات

خالد قبلي ببلكونه " بكالوريوس زراعة " سافر السعودية سنة ورجع بشوية جلاليب بيضة بيصلي بيهم الجمعة.

عبد الله البالكونة اللي قصادة " بكالوريوس تجارة " مقدم اوراقة في كل بنوك وشركات مصر ومستني التليفون يرن!

صلاح " ليسانس حقوق " البلكونة اللي قبله " بيتدرب في مكتب محامي على ملئ بطنه وعلبة سجاير!

حسام " خدمة اجتماعية " على السطوح سافر فيزا زيارة للإمارات بـ 7000 جنيه ورجع من غير ولا درهم .

حسن " ليسانس آداب- جغرافيا " اشتغل شوية مدرس جغرافيا بالحصة ، ولما زهق اتعلم النقاشة ومارس هوايتة في رسم الخرائط بالزيت والبلاستيك !

علي " سياسة واقتصاد " بيدرس تاثير السياسة الخارجية لعمدة بلدنا على حجم التبادل التجاري بينا وبين الكفور والميتات المجاورة .

بهاء "علوم – كيمياء " اشتغل شهرين في مصبغة ملابس بـ 200 جنية كان بيستلف عليهم علشان المواصلات ومنظفات علشان يطلع الصبغة من إيده وهدومة!

دول في المقدمة

اما البلكونات اللي في النصف الأخير من السوق

عبدالرحمن " معهد فني تجاري" اشتغل شهر مندوب مبيعات " لف المحافظة على رجله وما خدش ولا مليم ولا حتى الفلوس اللي دفعها في المواصلات.

ربيع " معهد فني صناعي " فاتح محل تصليح تلفزيونات وكل اعطال التلفزيون عنده تتخلص في كلمتين الـ أي سي والكوندنسر !

والباقي دبلوم تجارة وصناعة وزراعة

دول طبعاً غير إللي قابلوني ماشيين على رجليهم قاطعين السوق إلى الطريق علشان يقعدوا على المحطة يتبعوا حركة السير والمرور " ودول بقى جماهير الدرجة الثالثة" دول خليط من الكليات والمعاهد والدبلومات بس للأسف تقديرهم ما دخلهمش بلكونة على الشارع ولا حتى سطوح .

يعني تقدر تقول إن يوم التلات ده طلع يوم شباب الخريجين وانا ما اعرفش!!!

يااااااه ما تعرفش اد إيه انا اتبسطت من مشواري النهارده في السوق

اولاً علشان انا اكتشفت إني مش لوحدي من مشجعي السوق

ثانياً حرص شباب الخريجين في بلدنا على متابعة التبادل التجاري بين بلدنا والبلاد المجاوره.

ثالثاً دور التعليم في بلدنا في ملئ البلكونات الشاغرة والسطوح بكافة التخصصات !



" مهاجر"

جميله والله يامهاجر
وانا بقرا كنت بضحك على الاسلوب الجميل والساخر اللى كاتبه
بس بعد ماخلصت بكيت على حال الشباب
اسلوبك رائع فعلا
انك توصف وضع حزين وتقدر فى نفس الوقت ترسم بسمه
بس انا عجبنى حسن خريج اداب جغرفيا اللى اتعلم النقاشه
ياريت كله يتحرك بس يبدأ وربنا بيرزق
اما بالنسبه لحسام اللى سافر الامارات بفيزا ورجع من غير ولا درهم
فامايزعلشى كتير على الاقل هو كان مسافر فيزا
بس والله فكرتنى بسوق التلات كل اللى باقى فى ذاكرتى
منه مدرسة الشهيد عادل زلط مدرستى حبيبتى


ألا هو انت ساكن فين فى سوق التلات

تحياتي وارق تمنياتي العاطرة
اسجل اعجابي الشديد بالاسلوب الساخر الذي يشبه اسلوب توفيق الحكيم وثانيا انا ايضا خريج علوم 86 ودخلت بدل ماادرس بس طلعت في النهاية مدرس
يعني من الآخر سافرت اليمن وليبيا والآن بالامارات بالمناسبة حابب اتشرف بمقابلتك الشخصية في الاجازة لان فيه ان شاء الله لك شغل هنا بالامارات وانا سأحاول مساعدتك بأذن الله
اخوك رجب مليجي اللين

تحياتى لأسلوبك الساخر
وزعلان انى ما دخلتش من فترة عشان اشوف القصة الجميلة دى
فكرتنى بالبلد و سوق التلات و لعب الواحد وتلاتين على السجاير ايام الكلية و السهر للصبح بس يمكن احنا حظنا كان احسن شوية وما طولتش قعدتنا فى البلكونة او مع جمهور الدرجة التالتة
عجبنى جدا تناولك لموضوع شائك زى البطالة بالطريقة الجميلة دى وكلماتك الممزوجة باليأس و السخرية من الواقع ربما كان وقعها اكبر من الرصاص بس فى نفوس الناس اللى عندها دم مش اللى باعوا دمهم من زمن
لا تيأس يا صديقى
يمكن التليفون يرن فى يوم من الايام مش مهم بقى مين
وكالة الفضاء الاميريكية ناسا بيطلبوك للشغل
او اخوك الاستاذ رجب المليجى زى ما قال فى تعليقه السابق ياخد ك الامارات
او صاحبك ياسر بيقولك ابوه مات وحيورث و يطلع ايطاليا و يبعتلك ومش حياخد كتير خمسين الف بس
او حد تانى بيصحيك ويقولك هانت و بكره تفرج الظالم مات و الامور حتتصلح

او حتى سعد الصغير بيصحيك عشان تلحق ميعاد السوق

تحياتى و خالص مودتى و امنياتى الطيبة لك

أولا احب اشكر كل الأخوة اللي علقوا على القصة وتفاعلوا معاها واتمنى من كل اعضاء منتدانا ده انه ما يكتفوش بدور المشاهد اللي اصبح سمة من سمات الشعب المصري
لازم نشارك ونقول رأينا
نوافق ونرفض نثني على العمل الكويس وننتقد العمل الرديء
اما بخصوص التعليقات فاحب اشكرالاستاذ رجب اللين على كلماته الجميلة ومشاعره وتفاعلة مع صاحب القصة وانا يشرفني ان احنا نتقابل يا استاذ رجب .
أما الاستاذ حازم شلبي فكلماته دي مش جديدة عليه وعلى مشاركاته الجميلة والرقيقة وحسة المرهف
واحب هنا اسجل اعجابي بمدونته او أحلامه الصغيرة اللي اكيد يوم هتبقى كبيرة
وكمان باشكر الاخ محمد صاحب اول تعليق على كلامة الرقيق وعلى فكره انا اصلاً مش ساكن في سوق التلات !!!!!!!!!!!!!

السلام عليكم ورحمة الله وبركاته،لا تتخيلوا جميعا حجم سعادتي الان ، كما لو أني قد وصلت الي ما أريده الآن ، شباب ورجال من زناره عندهم الآراء والمواهب دي ، شيء بجد يحترم سواء أسلوب الكتابة الذي كتب به الموضوع (الساخر)،أو الردود الجميلة وما تحمله من إطراء علي طريقة ومضمون الموضوع ،كتابة ساخرة تتناول مشكلة هامة وهي البطالة وبتوضح ان التعليم والمؤهلات العليا الي بنحصل عليها في النهاية قد لا تفيد في شيء ، يعني زي ما بيقولو أكتر حاجة ممكن تعملها بشهادتك هي انك تحجز لنفسك مكان علي الرصيف أو كرسي في قهوة أو في قصتنا كرسي في بلكونة ،تشاهد وهذا اكبر أمل ليك أما ان يكون ليك دور دة بقي شيء صعب، المهم بجد مبسوط جدا بعد أن عثرت علي هذا المنتدي وأتمني أن تتقبلوا جميعا دعوتي للانضمام مع باقي شباب بلدنا الصغار سنا ولكن بجد هتلاقوا فيهم شباب زي الفل ،كل دة علي جروب البد علي الفيس بوك ودة الرابط بتاعه https://www.facebook.com/?ref=home#!/group.php?gid=101149528921
متمنين منكم أن تفيدوا وأن تستفيدوا ، وقصدي بأن تستفيدوا هو ان الفرصة سوف تكون متاحه لملاقاة شباب زنارة الأصغر سنا ولكن صدقوني هم شباب باذن الله لن تندموا اذا فتحتم معهم جسر ، هدفي من هذه الدعوة انضمامكم للجروب ، علي أمل أن تأخذوا بيد هؤلاء الشباب ليستفيدوا منكم ومن خبراتكم ومن طريقتكم في الحوار والتفكير ،والسلام ختام.