مش هاخد من وقتك كثير ، انت ناوي تروح تنتخب ولا مكبر دماغك ؟
قررت تختار ولا مستني حد يختارلك ؟
لو كنت مكبر دماغك ومستني اللي يجيبه الصندوق ، مش خايف ذوقه ولا تفصيلته ما تعجبكش ، ولا المقاس يطلع مش مظبوط يعني واسع شوية ولا ضيق ؟
ما تروح انت تختار اللي يعجبك ، بس قبل ما تروح اتأكد من المقاس وكمان الذوق والتفصيلة ! اصل الي هيجي هتلبسه اربع سنين ربنا يديك ويدينا طولة العمر ؟
روح انتخب واختار رئيسك ما تستناش حد يختار عنك ما تستناش حد يجيبلك رئيس انت مش عاوزه ، صوتك ممكن يفرق ،اوعى تقول " يا عم صوتي هيروح فين جنب اللي وراه ملايين " مش ممكن يكون صوتك هو الصوت إلى فوق الـ 50% لمرشحك او يكون الصوت الي يخليه يدخل اعاده !!!
اوعى تصدق الاعلام او الاستفتاءات كل دي افتكاسات او تصدق الي بيقولوا مرشحنا ناجح ناجح الكلام ده كان زمان !!!!
اوعى تدي صوت لمرشح مش مقتنع بيه علشان واحد قالك دا ناجح ناجح !!! لا ادي صوتك للمرشح اللي انت مقتنع بيه حتى لو كل الناس قالت دا فرص نجاحة ضعيفة !
اوعى تصدق الفتاوى التفصيل اللي شغالة اليومين دول ، ان اللي مش هينتخب المرشح ده هيدخل النار واللي هينتخبه هيدخل الجنة " على حد علمي ما حدش معاه تذاكر لا للجنة ولا النار "
واخيراً اعقد نيتك في التصويت لله ولمصلحة البلد ،حتى تثاب على النية
نسأل الله عزوجل أن يولى أمر هذه الأمة خيارها ولا يولي أمرها شرارها