يارب مترجعنى اعشق حد من تانى

إلى جلال عامر

يارب مترجعنى اعشق حد من تانى

شعر : السيد المسلمى

كده برضه يا ابو ( عامر )
ياحبيبي ميت وحىّ
خدعتنى وانت ماشى
وخدعتنى وانت جاى
مش إحنا كنا اتعاهدنا
ووعدتنى إن بكره مهما
يطوّل غيابه حتما ولابد جاى
عملتها وضربت ع الموضوع طناش
وشربت كاس يأسك لوحدك
م اللى شفته
لما مات الحلم قدامنا فى ساعة ما اتولد
لما جه وقت الحصاد
ولقيتها زرعة شوم
بينعق فوق شجرها البوم
وكفنها السواد واللى غطى واللى زاد
إن من كانوا غلابه اصبحوا أس الفساد
واللى علشانهم شربنا المرّ
حاجه تعرّ
باعو النصر فى أقرب مزاد
واللحية طالت وانتشى الجلباب
فخدتها من قصيرها
وسبت أهل البيت
دبيحه وغدوة للأوباش
والفجر لسه ما ابتداش يبدر فى صحارينا الخضار
والجنة لسه حلم مش باين فى وسط النار
إبليس معشش لسه فى الميادين
وفى الزنازين بيقرى سورة الأعذار
والمحكمة لسه بتتهجى
مناطيق الحجج
وأدلة اتهامات لصوص الدار بتمحيها اساتيك الأبالسه
وجلسه بتسلم لجلسه
والغراب باليغمه طار
واللى خارج م المطار واللى راجع م المطار
واللى مستنينا فى الضلمه
وحالف ليتاوينا
واللى بيغمّوا عينينا بالكلام إياه
بتوع اكتب واقول واحكى بكام
والشعب ياولداه فى مولد صاحبه غايب
ساعه يبقى فى اليمين
وساعه يبقى فى اليسار
وساعه يتغطى بخيبته ويلعن الثوار
ولسه المعركة دايره
مابين بكره وبين أمبارح الكابش فى خطاوينا
فقل لى إزاى يجيلك قلب
وإحنا فى وسط هذا الكرب تهملنا
وتنسى العهد والوعد اللى وثقناه من الأول
وحددنا مضامينه :
صلينا قرض الوطن جمعا
ورفضنا نمشى فى جنازته
ونحمى خاينينه
لاهمنا إزاى
نموت ولا عمر صوتنا اتخرس
لا خفنا بطش الكلاب ولا همّنا م الحرس
وحلفنا ع المصحف
لنفضحهم لجد الصبح مايطير عصافيره
فى ليل الظلم ونردّ المظالم للوطن
وبمجده نهتف
وفضلنا نستحلف لحد الحلم ما تفسر
صحيح لسه لأذناب الفساد دلاديل
صحيح الليل لازال زلزال بيمرجنا
مابين الشك والحيره
ولكن قول لى من إمتى بييجى الحق بالساهل
ماهو إحنا برضه نستاهل
عشان فرطنا م الأول
ومهما الظلم هيطوّل فله أخر
وده قولك
تكنشى نسيت ؟
ولاّ تكونش قريت وشفت اللى إحنا مش شايفين
فقلت فكيك وإزاى تسيبنا فى فى سكه
ضلمه وتستخبى فى كفن
من إمتى كنت ( جلال ) أنانى
طب كنت فطمنى ورسينى على الفوله
وقولى موته معقوله
وإنه حلاص مفيش فايده
وإن صوابعك العشره فى ليل الظلم مش قايده
بدل ما تسيبنى وحدانى
واهو النعش اللى ساع واحد يساع اتنين
سايب مصيبتك فى قلبى
وقلب عشاقك واحبابك ورايح فين
ولاّ دا مقلب من مقالبك
وبكره هتفاجئنا بالمقال المرّ من تانى
لفين ياحسرة وخدانى
يارب مترجعنى اعشق حدّ من تانى
وكرهنى فى جميع الناس
حرّم عليا الحب والإحساس
وعلمنى البلاده فى المشاعر
مش كل يوم ها أرثى حبيب
واودعه والاسم شاعر
ما انا كل ما اعشق حد بيسيبنى
فى عزّ العشق اشرب
ناره ويزعزع كيانى
يارب سيبنى اعيش
الباقى من أيامى وحدلانى
يارب مترجعنى أعشق حد من تانى