بالسلامة.يا أوباما

‏الدكتور الشاعر صلاح عبدالله‏
بالسلامة.
بالسلامة...
يا أوباما...
أيها النسر الذي أصبح يمامة...
هما بيقولوا أنت ريس...
وإحنا بنقول لك يا ماما...
رحت للإخوان يا مقفول النفوخ...
لجل تكسب حاجة حطوك ع الصاروخ...
وإحنا لو يوم قلنا للحنضل يا خوخ...
هانلاقي له في بقنا سنة طعامة!!!!...
رحت تصطاد الوحوش اصطدت دود...
والخازوق من قوته عدى الحدود...
أوله عندك وآخره في اليهود...
وإلي ما بيعرفش يصطاد الأسود...
يبقى يتنيل يروح يمسك حمامة...
بالسلامة...
كنت تيجي يوم خروجنا تبص بصة...
لجل ما تشوف أحلى قصة...
الموائد في الشوارع قاعدة بتنادي الجعان...
والجرس نايم على كتف الأدان...
والبيوت متزوقة زي العرايس...
والأمل زغروطة بترفرف على سطوح الجوامع والكنايس...
طب وديني لو تشوفنا...
كنت هاتقول إنه أحلى يوم قيامة...
بالسلامة...
إحنا مصريين عرفنا من الديانة...
إن ربك وحده في إديه الإعانة...
والإعانة مهما كانت تبقى مرة...
لو تكون متغمسة بطعم الإهانة...
حاجة مش ممكن هاتعرفها في حياتك...
ليه؟ لأنك أنت مش عايش معانا...
حاجة جوا قلوبنا من يوم ما اتنشأنا...
مستحيل هاتموت بطلقة أو بدانة...
وإلي يتنازل وينوي يطاطي راسه...
بقه هايلوث حروف كلمة كرامة...
بالسلامة...
إحنا مش زي ابن موزة...
إلي ما ليهوش أي عوزة...
إلي آخره يبقى مية...
تندلق من أي جوزة...
مصر دايما عودها ناشف...
مصر مش لحسة بلوظة...
هو معقول إن حوت...
يترعب من استكوزة!!...
ابن موزة مش هايبقى في يوم كبيرنا...
اللباس عمره ما ينفع يبقى خوذة...
أنت عارف إحنا إمتا نصدقك؟...
لما سيدنا المسيح ياخد ديانته عن يهوذا...
مش هاييجي يوم وتبقى الخرقة بدلة...
أو قميص النوم هايتحول بجامة...
بالسلامة.