هذه الابيات رد على سؤال الاستاذ يسري عيسى عن معنى جملة " من اجل مصر "
من اجل مصر !!!
مصر مين
مصر بلد الحكام
ولا بلد المحكومين
مصر احفاد الفراعنة
ولا بلد الطيبين
مصر نواب القروض
ولا بلد المطحونين
من اجل مين
مصر اليسار ولا اليمين
مصر ابطال العبور
ولا تجار العبور
مصر مينا ولا احمس و السادات
ولا مصر اولاد الذوات
مصر مشرفة وزويل والباز
ولا مصر اللي باعوا لليهود الغاز
مش كل دي الغاز!!!
مصر اللي ماتوا مفحمين
فـ ليلة عيـــــــد
ولا مصر محتكر الحديد
مصر ثومة أوحليم
ولا شعبان عبدالرحيم
مصر مين ولا مين
مصر هربت منَا فين !!
شمس غابت من سنين
مش باقي منها غير ملامح
في عيون ولادها الطيبين
مش باقي منها غير اماني
في قلوب عيالها المخلصين
من اجل مصر
وعلشان خاطرها
سيبوها يوم تختار مصيرها
شيلوا ايدكم عن حاضرها
سيبوها تختار من ولادها
قبطان يقود دفة جهادها
ويرجع المجد اللي فارق من سنين
يرجع الخير اللي منهوب من سنين
يرجع الفرح اللي فارق من سنين
" مهاجر "
موضوع: من أجل مصر 
الإثنين 25 أكتوبر 2010 - 13:21
