الدكتور الشاعر صلاح عبدالله
نشيد التحرير.
توت توت توت توت.
الحرية ولا القوت؟
هاتموت وأنت ذليل ومصدِّي؟
ولا تموت راجل بتحدي؟
أصل العمر أكيد هاعدِّي،
وفي كل الأحوال هاتموت.
توت توت توت توت.
الحرية ولا القوت؟
تستعجل ع اللقمة تذلك.
والقهر من السما ينزل لك.
وتخاف حتى ولو من ضلك.
وحياتك راح تبقا تابوت.
توت توت توت توت.
الحرية ولا القوت؟
بالحرية هاترفع راسك.
الحرية دي هي ميراثك.
بأدانك قولها وأجراسك.
واصرخ بيها كفاية سكوت.
توت توت توت توت.
الحرية ولا القوت؟
إوعا تخاف تهويش أو علقة.
وتطنش وتقول بلا فلقة.
ماهو لازم تستحمل طلقة.
لجل ما تزرع شجرة توت.
توت توت توت توت.
الحرية ولا القوت؟
قول للعالم بصوا وشوفوا.
شوفوا شبابنا بيكسر خوفه.
أولاد مصر وأحفاد خوفو.
والموت جواهم بيموت.
توت توت توت توت.
الحرية ولا القوت؟
لما قدرنا نكسر خوفنا...
الدنيا دي بقت في كفوفنا...
قول للعالم بص وشوفنا...
شوفوا بسريا بتبلع حوت...
توت توت توت توت. الحرية ولا القوت؟
إمتا كرامتك ترفع راسك؟...
إمتا تجيب العزة لناسك؟...
أنا نفسي أعرف إيه إحساسك؟...
لما بتاخد بالشلوت؟...
توت توت توت توت
الحرية ولا القوت؟...
يالي رفضت إنك تهتم.
م الخوف ع الهدمة وع المم.
في التحرير مكتوب بالدم.
موت راجل أو عيش هلفوت.
توت توت توت توت.
الحرية ولا القوت؟
موضوع: نشيد التحرير. 
السبت 15 يونيو 2013 - 16:48
