لاني بطبعي قليل الربايه

‏‎Ahmed Abdo‎‏

لاني بطبعي قليل الربايه

وبمشي بِشَد الوِدان والعصايه

اسمحلي جنابك سيادة الرئيس

اتمرمغ فـ كرمك براحتي واهيص

واحجز في سجن الغلابه سويت

شبعت الكباب وحشني الصميت

باكل وبنكر ماقولشي كفايه

لاني بطبعي قليل الربايه

استاذن سعادتك فـ اتنين جنيه

هافطر عيالي سيمون فيميه

ياريس فـ عهدك شبعنا فلوس

شربنا السعاده فـ هيئه لبوس

ضميري حايشني اطاطي ليك

دعيتلك زمان فهدعي عليك

لابس قميص بقي لابس عبايه

لاني بطبعي قليل الربايه

اسمحلي ياريس اكسر قانونك

قانون الجماعه لايسري بدونك

شبعنا شقاوه في حوش العبيد

وباشت وشوشنا فـ دم الشهيد

شكيت للي جابني وجابك رئيس

فـ دعوه ولِيِا فـ ليله خميس

ملقتش فايده .. فرشت الملايه

لاني بطبعي قليل الربايه

فـ عهدك يا ريس اتساوي الجميع

عدلك ياباشا ده فوق الفظيع

ساوي التعري رجّاله بحريم

ياخوفي ياريس وحكم اللئيم

مش باقي في جسم الغلابه الا صوت

ولا باقي فـ ماتش الرياسه الا شوط

هانرفع سعادتك فوق كارت أحمر

لون دم غَرّق لون شاب أسمر

وبكره يغرّق رخام السرايا

ده جيل عضمه ناشف قليل الربايه

يافرحه ماتمت وخدها الغراب

زرعنا انتخابك حصدنا الخراب

جماعتك يا باشا خلاص ضيعوك

وكل الي جابك بالتالي سابوك

ياريس تشجع وواجه حقيقتك

لامتي تنافق وتداري خيبتك

يافاشل بدرجه معالي الرئيس

يا مغرق بلادك فـ قعر الهويس

سامحني بجاحتي في سرد الحكايه

لاني بطبعي قليل الربايه