النهضة.النهضة.

النهضة.
النهضة يا بت. النهضة ياواد...
هاتخلي بلادكم أحلى بلاد...
السما هاتمطر ملوخية...
والترعة هاتتملي تسقية...
والأندروير يبقى طاقية...
مصر هاتصبح تكسي بعداد...
النهضة يا بت. النهضة يا واد...
في العشة هايتركب تكييف...
وعيون بالزوفة لكل كفيف...
وهاتبنوا بيوتكم بالبلوبيف...
ولا حوجة لبنا ولا لحداد...
النهضة يا بت. النهضة يا واد...
وهاندي العازب مية فدان...
مزروعة شجر يطرح نسوان...
وهاتِتوِلِد الطفلة بستيان...
أتجوز واملا الكون أولاد...
النهضة يا بت. النهضة يا واد...
والجزمة هاتاخدك وتطير فوق...
والفرخة تبيض البيض مسلوق...
وتملس ع العيش المحروق...
يبقى أطعم من كعك الأعياد...
النهضة يا بت. النهضة يا واد...
وهانزرع قتا بالقنطار...
وهاتسترجل وهاتبقى خيار...
وبدال الدسكو هانعمل زار...
للممسوس إلي عليه أسياد...
النهضة يا بت. النهضة يا واد...
والعيش هاتشوفوه هاتضحك له...
هاتزغرط لما تشوف شكله...
يدخل بطنك قبل ما تاكله...
يستاهل إنه يكون في مزاد...
النهضة يا بت. النهضة يا واد...
وإن كان لياليك ضلمة مهببة...
نصرف لك مرشد بالكهربا...
صدقني دي وصفة ومتجربة...
هايلعلع من مصر لبغداد...
النهضة يا بت. النهضة يا واد...
بالنهضة هانثبت سنك...
ونخلي أبوك أصغر منك...
وهاتفرح بالدنيا إكمنك...
عشت إلي ما عاشهوش الأجداد...
النهضة يا بت. النهضة يا واد...
هانغير قوانين اللعبة...
ولا تبقى في مصر ظروف صعبة...
ونبطل طوفان بالكعبة...
ونطوف حوالين مبنى الإرشاد...
النهضة يا بت. النهضة يا واد...
يا مصري اصبر واتأنى…
هانخلي لك بلدك جنة…
يوم ما البسبوسة تكون حنا…
والتبن بخور. والفتة سماد…
وإياك تسمع أي معارضة…
سيبك منهم دول ناس مرضى…
غمض عينك واصبر وارضى…
واحلم بالخير زي المعتاد…
وهاتتفاجئ بالنهضة يا واد…

...salah abdallah