أنا آسف

دلوقتى بس ممكن اموت
ولأنى مقدرتش اجيب الحلم لعيونك
وأغزلك ربيع اخضر و اعطر قلبك الفياض
وأبوس إيدك و أحلب من صدور الحزن يوم عيدك
وعيدك شمس شموسة
وأهدى للوجود بوسة
واخليكى صحيح و بجد محروسة
وأسطر فى الوجود مجدك و أتسطر

لأن الوقت متاخر
فأنا اسف
أنا أسف

لأنى حلمت بالصبح اللى جاى يضحك فى ليل داكن مفيهش شموس
وكف الحلم كان ناعم و كف الظلم كف كابوس
لأنى و قفت فى زمن القعاد و الدوس
لأن الظلم فضاهم
وخلاهم جسد نازف مفيهش نفوس
لأنى نبحت فى صوتى فى ناس بتتاوب ومش حتقوم لا بالظاهر و لا المحسوس

أنا اسف
أنا اسف

لأنى زرعت احلامى فى كف الليل و انا فاكر بأنى بأحطهم فى الشمس
لانى صرخت فى الهيصة و فى المولد
فلا واصل صراخى صراخ
و لا واصل صراخى همس
عقرت حصانى و ربطت القدم
حالف لأجيب بكرة وأتارينى بأجيب ........ الامس

لانى عشقت ترسيمة خدودك يلى سكنانى
و عاشقك و انتى عشقانى
ورسمانى على خدود الشجر فارس و لا الفرسان
وكان العشق ما بينا صلاة و ايمان
وكان الوقت ..... وقت الصبح ما سافر
فقالوا عليا انا كافر
انا كافر
فطر بالكلمة بعد الشمس ما سافرت و بيجاهر
أنا ميت و استاهل
آدان العتمة بيأذن فى نص الليل و ما بأؤمشى
يقوم الكل و يصلى ..... ويركع مش مهم لمين
وبيموتوا موطيين لرب حزين
ولا سامع و لا شايف و لا غافر
وقالوا عليا انا كافر
أنا كافر
رفضت أطوف
و أسعى بين جبال الخوف
وأشوف إبليس بيتعشى ببلد و يحلى بالتانية
وأشوف ناسى ضهورهم تنكسر و تدوب من التنية
رجمت بقوتى إبليس
رجمونى
ورجموا الصبح فى عيونى
ويوم اللحد صلبوا الارض بالمسامير على قلبى و صلبونى
وباب التوبة مفتوحلى ... رفضت أتوب
و ألبس توب ماهوش توبى
وداب الحلم جوايا فقلت أسقى الوطن دوبى
يا جايبين الكفن خلوه
وداروا وشوشكوا و اتغطوا
ولاتغطوش على جبين اترفع يلى أنتوا بتوطوا
يا شايلين الجسد مدوا و ودوا للحبيب صورتى و مكتوبى
وسموا عليا
ما تسموش
عليا الارض بتسمى
ومشتاق التراب دمى
ونزف الدم بيزغرد و بيغنى
وتشرب زرعة الصبار مواويلى
وترسمها على عيون اللى حيجيلى
تشوف الصبح فى عيونهم تمد جدورها و تحكيلى
وييجى اليوم وتتعرى البلاد للشمس
وتحبل صبح على كيفك
تلف النجم فى رغيفك و تتديه للعيال تاكل
و عالقمرة العيال تجرى و تتسابق و تتشاكل
وصبحك فل يا وطنى و صوتك ناى
وإن كان النهارده فات فبكره جاى
وأنا يا صبح بأكتبلك
رسالة عشق من قلبى و انا ماضى وانا راضى
بس جيب للأرض عشاقها
وجيب للحلم عشاقه
وخلى ولادنا يشتاقوا
وقطع للبلاد مناديل
من الظالم
من الظالم و ....... أشلائه
..............................................................................

شاعر مصر الحر ........ محمد جودة

https://www.youtube.com/watch?v=2OeAKtVQsS8 القصيدة يمكن سماعها بصوت الشاعر على الرابط التالى

"تلف النجم فى رغيفك و تتديه للعيال تاكل
و عالقمرة العيال تجرى و تتسابق و تتشاكل
وصبحك فل يا وطنى و صوتك ناى
وإن كان النهارده فات فبكره جاى"

قصيدة رووووعة
وشاعر أروع
واختيار اكثر من رائع
شكراً حازم

جميل جدا ياحازم واجمل يامصطفى وبكملك يادرش وبقلك فبكرة جاى ازاى فيه ناس تغنى على الناااى وفيه ناس مش لقيه الشاى