فين الحقيقة يا شعب مصر

‎Alsayed Almeslamy‎
فين الحقيقة يا شعب مصر

فين الحقيقة أنا عقلى شتّ يا خلق هووووووه
الحق له رجلين حقيقى وأهل ولاّ حنطوو وووووه
هنقب ولاّ هنتسخط مين اللى صح ومين غلط
ما أنا أصلى مش تور واتربط وف أى ساقية تدوروه
فين الحقيقة ياخلق هووووه
***
فين خيالين الحق
فى العوزة والشدة
المليانيين شدّة
لومالت الموازين

فين اللى قالوا لأ
وصرخوا فى الميدان
يسقط نظام الفساد
لحد ما استأصلوه
وقدروا يتحدوه
وفرضوا ارادتهم
وم التاريخ طردوه
قولوا لى ياخلق هوووه

فين وحدة الأمة ووحدة الأهداف
فين بكره فين الأمل والعدل والانصاف
ليه كلنا بنجرى ليه كلنا بنخاف
ليه كلنا شاكين فى كلنا وخايفين يا أمة من بعضنا
الحق من حقنا لكن نجيبه إزاى ؟

جاوبونى يا شعبها
غالية عليكوا إزاى
بتعشقوها إزاى
خايفين عليها إزاى
شايفنها بكره إزاى
كسرتوا ليه نفسها
وهى لسه يادوب
بتداوى فى جراحها
فليه نشرحها
كلماتى هشرحها
لو كنتوا مش فاهمين
ولا إحنا ناس مجانيين
مش أد حب الوطن
ولا أد أفراحها
ديقتوا فى براحها
واديتوا للانجاس فرصة
يعايروها
باولادها وف نفسهم
لو طالت الغربة بين مصر واولادها
وهما اكبادها
وهما
أولادها
بس المصيبه إزاى
مش عرفوا حسادها
وفوتوا الفرصة على سارقين زادها
وسارقين حلمنا
المتغاظين مننا
ونفسهم لو فى يوم
يلاقونا مش فاهمين
ومقتلين بعضنا
ياخلق هووه والنبى
ضموا على بعضكم
وشغلوا عقلكم
ارجوكوا من فضلكم
لو مصر دى أمكم
لو مصر دى أمكم
لومصر دى أمكم

" ستاتى على أمتى سنوات خداعات يكذب فيها الصادق و يصدق فيها الكاذب ويؤتمن الخائن و يخون فيها الامين وينطق فيها الرويبضه"
صدق رسول الله صلى الله عليه وسلم
فعلا نحن نعيش في سنوات خداعات ، لا تعرف من الصادق ومن الكاذب من الأمين ومن الخائن ، كثر اللغط وانتشر الهرج وامتلأ الإعلام بالرويبضات